Screen Size

Vrolike Winterprag

Alhoewel die aande in die binneland nou koud is, is dit eintlik ongelooflik lekker om gedurende die dae buite te werk in die heerlike sonnetjie wat nou nie te warm is nie. Meeste groei kom nou tot ‘n stilstand en as jou bladwisselende plante nog nie hulle blare verloor het nie, gaan hulle dit nou wel doen. Dis ook hierdie tyd van die jaar wat die meeste meerjarige plante stadiger groei en afhard.  Die winter maande is ook wanneer die bome die donkerder streep in die jaarringe kry en dis hoe ‘n mens jou boom se ouderdom kan bepaal. Daardie donker strepe wys eintlik hoeveel winters die boom deurgemaak het. 

As jy nog nie jou winter saailinge in die grond het nie, is dit nou die tyd om dit te doen. Onthou saailinge het ’n ses weke voorsprong bo saad. Saailinge word professioneel gekweek en gaan binne ’n kort tydperk begin blom, wat beteken dat jy ’n langer blom periode in die winter gaan hê. 

Saam met die eerste saailinge wat jy geplant het, gaan jy nou winter onkruide kry wat tussen die bolle en saailinge gaan opkom al is dit winter. Maak seker dat jy ‘n klein hand vurkie of hand harkie gebruik om die onkruide uit te haal voordat dit te groot word of behoorlik wortel geskiet het. 

So gepraat van bolle, maak seker dat jy nou al die laaste lente bolle in die grond kry want die lelie bolle gaan nou binnekort op die rakke wees. As jy solank die beddings met voldoende kompos wil voorberei vir jou lelies, kan jy so maak. Soek ‘n geskikte bedding met halfdag tot voldag son. Spit baie kompos in en maak seker dat die dreinering goed is. As jy sukkel met swak dreinering moet jy baie goed gewaste riviersand of fyn bas en nog meer kompos ook inspit. ‘n Handvol beenmeel of superfosfaat per vierkante meter is altyd raadsaam om ook by te strooi en bolangs in te werk.  

As jy graag hardehout steggies van houtagte struike en bome wil maak, is dit nou ‘n goeie tyd om dit te doen. Gebruik ’n hormoonpoeier nommer 3 om jou hardehout steggies te stimuleer om wortels te maak.   

Twee ander plante wat nou ook aandag moet kry is Japonikas en Azaleas. Hulle gaan nou binnekort blom so hulle begin nou al blomknoppe vorm. Gee jou plante ‘n lekker deklaag suurkompos, veral as hulle in potte is. As die grond om die plante hard en droog is, moet ‘n mens die grond effens los maak om die kors te breek. Saam met die suurkompos kan jy ook ongeveer ‘n halwe koppie 3:1:5 bygooi. As jy nog sukses met jou Azaleas wil hê, moet jy ‘n klein bietjie ysterchelaat om die plante strooi en dit goed benat. Die resultate is asemrowend en jou plante sal onophoudelik blom.          

Tuingroete
JJ
Copyright © Garden World 2017 - All rights reserved.  |  Privacy Policy