Screen Size

Die einde van die winter is in sig…. of so hoop ons...

Is dit nie ongelooflik lekker om te weet dat lente weer net om die draai is nie? In laerskool Aardrykskunde is ons geleer dat die wintermaande Junie, Julie en Augustus is, maar ons weet dat die herfs-, winter- en lente-seisoene baie korter geword het.

Na jou tuin ‘n behoorlike rustyd gehad het, gaan alles weer een van die dae bloei en floreer.  

Al jou lentebloeiende plante soos jou vrugtebome, bloureë,  blomperkes, blomkersies en blomkwepers het nou baie water nodig om die bloeisels te ondersteun. Maak seker jy gooi hulle ten minste twee keer per week goed nat. Dis ook beter om die tuinslang langs die plante neer te lê en die plante nat te lei.   

Ongelukkig is die eerste groen wat mens gewoonlik op grasperke en in beddings sien baie keer vinnig ontkiemende en sterk groeiende onkruid. Baie onkruid het net ‘n paar dae nodig om weer en weer saad te skiet so as jy nou vinnig spring en daarvan ontslae raak sal jy ‘n groot gedeelte van jou someronkruid-kopseer uitroei. 

Nou is ‘n goeie tyd om ook jou potte oor te plant. Ons almal is lief vir potplante op ons stoepe in ons huise en op groot geplaveide areas, maar sodra daai potte oud raak of die wortels nie meer spasie het om te ontwikkel nie, kan die plante nie meer groei nie en kwyn hulle eintlik weg. Hoe jy te werk gaan is om die plant goed terug te sny en versigtig uit te haal. Jy mag selfs die pot op sy sy neerlê om die taak van uithaal te vergemaklik. Breek die wortels effens los en indien nodig, sny die buitenste 10% van die wortels en die grond eenvoudig weg. 

Voor jy plant, maak seker die dreineringsgate is oop en gooi ‘n paar klippies op die gate. Kry vir jou ‘n dreineringslappie en plaas dit bo-oor die klippies en herplant jou plant in goeie potgrond gemeng met beenmeel of ‘n beenmeel gebasseerde organiese Vita Grow. 

Indien dit ‘n pot is wat vinnig uitdroog kan jy Starke Ayres se palmveen inmeng om vog terug te hou. Indien jy nie alles self wil meng nie kan jy Just Organics se professionele potgrond gebruik wat klaar gemeng is met veen en organiese bemesting. 

Baie belangrik is om jou pot baie goed nat te maak direk na die oorplanting om al die luggate op te vul en om seker te maak dat die wortels goeie kontak maak met die grond. 

Lekker Tuinmaak.

JJ

Copyright © Garden World 2017 - All rights reserved.  |  Privacy Policy