Screen Size

Tuinwenke vir Januarie

Die feestyd is verby en soveel van ons was weg met ‘n wel verdiende verlof. Met al die gejaag in die nuwe jaar, vergeet ons soms van die tuin. 

Hier is ‘n paar nuttige wenke oor wat om in die tuin te doen: 

Plant jou kersboom uit of oor indien jy een van die gelukkiges was om ‘n lewende kersboom te kon hê! Meeste mense sit hulle kersbome binne gedurende die feesgety en ongelukkig hou die bome niks daarvan nie! Plant die boom eerder in die tuin of in ‘n groter houer, voer met iets soos ‘n organiese 2:3:2 / Gwano en sny hom nou al terug. Jy het 11 maande om jou kersboom weer in top gehalte te kry! 

“Nip & Tuck” - Deur die somer voer ons, gooi water waar ons kan, en alles wat groen is bars uit hul nate. As jy nie nou hier en daar effens gaan terugsny nie, veral nie daai takke wat uit verhouding groot gegroei het nie, gaan jy opeindig met oorgroeide, slordige bosse. Gewoonlik sal ongeveer ‘n 20% terugsnoei genoeg wees.  

Kry meer uit jou saailinge - breek die ou blomme gereeld uit soos hulle afgaan. As jy dit doen en jy voer jou saailinge met iets soos oplosbare Multifeed / Multisol K, sal jy ‘n onophoudende tapyt van kleur regdeur die somer hê. 

Nou dat jou gras so sterk groei is daar ‘n paar goed wat jy moet doen om seker te maak jou grasperk bly lower groen. Sny gereeld – moenie dat jou gras te lank en slordig word nie. Sodra jy jou grasperk twee duim te lank laat groei en jy sny terug, staan jy ‘n goeie kans om die gras bloot te stel aan sterk son en dit veroorsaak dat jou gras leë oop kolle en gate kry. Hoe meer gereeld jy sny, hoe digter word jou grasperk. Voer jou grasperk met ‘n kunsmis / bemestingstof hoog in Stikstof. Gebruik iets soos ’n 7:1:3 of organiese 5:1:5. Die nuwe ‘Gro Green’ bevat ook ekstra Koolstof wat jou makro elemente nog beter laat absorbeer. Dit is baie belangrik om jou gras eers te sny, dan te voer en dan baie goed nat te maak.   

Nie almal het groen vingers nie en daar is niks daarmee verkeerd om hulp te vra nie. Dit is nou ‘n goeie tyd om iemand in te kry om jou te help met jou tuin. Ons almal spandeer baie geld en tyd in ons tuine en met behoorlike beplanning en ‘n klein bietjie leiding gaan jy soveel meer sukses behaal.

Min plante in die tuin gee mens soveel kleur en genot soos rose, maar om jou rose weer op hulle mooiste te kry vir die res van die somer moet ons nou bietjie aandag aan hulle skenk. Ons moet begin met ‘n somers snoei. Dit is heel eenvoudig waar ons ±30% van die plante terugsny en ook meeste van die blare afhaal. Die blare wat geval het moet jy ook optel en dan kan ons die hele plant en grond met ‘n fungus doder soos bv. Myco guard of Odeon behandel. Dis ook nou ‘n goeie tyd om elke roos bos met ‘n koppie vol 8:1:5 / Organiese Flower Power of ‘n Eetlepel ‘All for One’ te voer wat blomme sal bevorder. Gooi goed nat, verkieslik in die aand op die grond en hou die blare droog om fungusse te vermy en jou rose sal binne ‘n japtrap weer pryk in hulle volle glorie. 

Lekker tuinmaak!

JJ

Copyright © Garden World 2018 - All rights reserved.  |  Privacy Policy